Кеше Мемлекет басшысы Қасым-Жомарт Тоқаев Қазақстан халқына кезекті Жолдауын жолдады. Мұнда айтылған мәселелер әр саланың алдағы бағытын түзеп, мақсатын айқындады. Президент әлемді жайлап, өкпеден қысқан кеселге тоқталған соң дәрігерлерге, құқық қорғау органдарына, еріктілерге алғаусыз алғысын айтып, алдағы уақытта да күрес жалғасатынын жеткізді. Әрі Қазақстан экономикалық бағыты 7 негізге сүйену қажет екенін де баса айтты. Онда ол «Экономика халықтың әл-ауқатын жақсартуға жұмыс істеуі тиіс. Ұлттық табыстың өсуінен әлеуметтік лифтіні тиімді қолданып, пайданы тең бөлуге қоғамдық ұсыныстың өсуі оң шешімін табуы тиіс. Сондықтан еліміздің жаңа экономикалық бағыты басты 7 принципке негізделуі тиіс» деді.

Негізгі бағыт – игілік пен міндетті тең бөлу, жеке кәсіпкерліктің жетекші рөлі, жаңа кәсіпкерлерге арналған нарықты қалыптастырып, әділ бәсекелестікке жағдай жасау. Әрі технологиялық экономикаға иек арту, өндірісті, адам капиталын дамыту, инвестиция мен білімнің жаңа түрін қалыптастыру, экономиканы жасылдандырып, қоршаған ортаны қорғау сынды мәселелер шет қалмады. Ал басымдық – мемлекет негізделген шешім қабылдап, қоғам алдында сол үшін жауап беруін қамтамасыз ету.

Алдағы уақытта осы бастамалардың оңтайлы жүзеге асуы қалды. Асарына сенім де мол. Бірақ ол үшін біздегі қоғамның нық қадамы мен жұмыла көтерген бірлігі қажет.