Адамзат руханиятында мәдениеттің орны зор. Ол жас буын өкілін туған жерін сүюге, Отанына қызмет етуге, адалдыққа тәрбиелейді. Бұл тұрғыда ауданда көптеген шара өтуде. Соның бірі – Қармақшы ауылдық модельдік кітапханасының кітапханашысы Г.Бадырақтың ұйымдастыруымен өткен «Жас ақындар – руханияттың діңгегі» әдеби-сазды кеші.

Шара орталықтандырылған кітапханалар жүйесінің «COWORKING» орталығында өт­ті. Басты мақсат – қазақ халқының салт-дәстүрі мен мәдениетіне, әдебиетіне шолу жасай отырып, жұртшылыққа жас ақындар шығармашылығын таныстыру.

Кешті ауыл әкімі Әлімбай Білжанов ашып, оның маңызына тоқталды. Мәдени шарада Орынбек Құндыбеков жергілікті ақын О.Өткелбайдың «Киелі мекен – Қармақшым» атты әні орындалса, талабы тау­дай жас өрендер Дана Мұратқызы, Аружан Сақтағанова, Толғанай Бекболатқызы, Ақгүл Амановалар өз өлеңдерін оқырман қауымға оқып берді.

Кеште ауылдық клубтың қызметкерлері, өнерлі отбасы – Смайловтар ән-жырдан ша­шу шашты. Кеш соңында ақын Ордабек Өткелбай жас өрендерге тілегін айтып, жүрекжарды лебізін жеткізді. Сонымен қатар ақынның «Жеңгелеріме» атты әнінің тұсауы кесілді.

Шара соңында аудандық орталық­тандырылған кітапханалар жүйесінің директоры Күлшара Қаниева қатысушыларды алғыс хатпен марапаттады.