ЖАМПОЗДАР ЖИЫНЫ
Жақында аудандық орталық кітапханада Елбасының «Болашаққа бағдар: рухани жаңғыру» мақаласы аясында «Ұлы Дала жауһарлары» тақырыбында әдеби кеш өтті. Оған орталық кітапхана жанынан ашылған Т.Ізтілеуов атындағы бірлестік мүшелері қатысты.
Кеште жергілікті ақын-жазушылар Үрліхан Өндібаева, Достық Тілеубергенов, Ордабек Өткелбай, Мәскеубек Ерболатовтар өз туындыларын оқып, жас ұрпаққа өнегелі әңгіме өрбітті. Сондай-ақ, тұрмағамбеттік термеші Шұғыла Мархабатова Ү.Өндібаеваның сөзіне жазылған «Қорқыт дала жыраулары» атты термесін орындаса, өзге де өнерпаздар жергілікті ақын-жазушылардың шығармасынан үзінділер оқып, айтулы кешті әнмен әрледі.
– Ауданда «Рухани қазына» жобасы жүйелі жүзеге асуда. Бүгінде 200-ге жуық жергілікті ақын-жазушының тізімі алынып, олар жөнінде қажетті деректер жинақталды. Мұндай шаралар келешекте де өз жалғасын табады, – деді аудандық орталықтандырылған кітапханалар жүйесінің директоры Күлшара Қаниева.
Кеште жас ұрпақ өкіліне кітапхана атынан сый-сияпат тапсырылды.
С.КЕНЖЕҒАРА.
