ЖЕТІНШІ СӘБИЛІ БОЛҒАНДА ҚАЙНАҒАМ ҮЙ СЫЙЛАДЫ

Құндылық Жайсанкүл Нұрбекова, жас батыр ана:
Бүгінгідей дамыған заманда қаншама ғалым зерттеу жүргізсе де, жас сәбидің иісіне ұқсатып бірде-бір иіс су ойлап таба алмапты. Мұны қалайша Тәңірдің құдіреті демессің. Бірде ұлық Пайғамбарымыздан сахабасы: «Әлемдегі ең сұлу адам кім?» деп сұрапты. Сонда Адамзаттың абзалы: «Ол – дүниеге сәби әкелгелі отырған ана» деген екен. Шынында да, адам өмірі – ұрпақ жалғасымен мәнді, оған жақсы тәрбие беруімен маңызды. Әйел-ана отбасы, ошақ-қасының иесі ғана емес, сондай-ақ адамдар арасындағы достық пен береке-бірліктің ұйытқысы. Сондай ананың бірі – Жосалы кентінің тұрғыны, «Алтын алқа» иегері Жайсанкүл Нұрбекова.
Жас батыр ана Ж.Базарбайқызы 1980 жылы Жаңақорған ауданы, Екпінді ауылында өмір есігін ашқан. Болашақ жарымен Жосалыға жақынына қонаққа келгенде танысады. Сөзі мен сезімі жарасым тапқан қыз бен жігіт өмір бойы бір болуды қалады. Міне, содан бері де арада 18 жыл өтіпті. – Сыйластық пен татулықтың жемісі – жеті баламыз, – дейді алтын алқалы ана жүзі шырайланып.
– Отағасы Бақыт Ерғазиев күзетші болып жұмыс істейді. Тұңғышымыз Лаура– кенттегі аграрлы-техникалық колледждің 3-курс студенті, тігіншілік мамандығын меңгеруде. Зарина мен Нәзира – №26 мектептің 3, 11-сынып оқушылары. Нұрсезім мен Дилназ – жақында мектеп табалдырығын аттайды. Нұрдәулетіміз – 2 жаста, «Аққайың» балабақшасының тәрбиеленушісі болса, жанұяның сүт кенжесі – Сұлтан жастан енді асты. Өзім – «Шипагер» емханасында кіші аяжанмын, – деді ол әңгімені жалғай түсіп.
– Енем – Өзтай Қарғабайқызы да, анам – Дәмегүл Байболова да 8 баланы дүниеге әкелген алтын құрсақты аналар. Абысыным – Манат Ілиясова да 5 баланың ардақтысы. Қазақта: «Жақсы жерге келген келін – келін...» деген даналық сөз бар. Сол айтқандай, өнегелі әулетке келін боп түстім. Келген жерім оқыған, өскен жандар болды. Бүгінде 4 абысыным бар. Бір-бірімізбен татумыз. Енем өте жақсы адам болыпты. Өкінішке қарай, мен енемді көре алмадым. Менің атам да, енем де – үлкен қайнағам мен абысыным. Бізге қашан да қолынан келген көмегін аяған емес, – дейді Ж.Нұрбекова.
Расында да, жомарт жүректі қайнағасы Болат Ерғазиев інісі Бақыт пен келіні Жайсанкүлдің шаңырағында жетінші бала туылғанда үш бөлмелі үй тарлық етеді деп, үлкен үй сыйға тартады.
– Балалардың оқу үлгірімі ойдағыдай. Зарина – кітап оқығанды, ал Нәзира – ән айтып, би билегенді ұнатады. Келешекте ұл-қызымызды оқытып, жетілдірсек деген арманымыз тағы бар. Ол үшін жатпай-тұрмай, еңбек етсек дейміз. Білім грантына түссе – нұр үстіне нұр. 18 жыл Құдай қосқан қосағыммен үйлесімді өмір сүрудемін. Қазір келіндер 1-2 баламен шектеліп қалады. Бала деген – бақыт қой. Өрісіңді кеңейтетін де – бала. Өз басым оған қарсымын. Мен ұлды болғанша тоқтамаймын дедім. 5 қыздан соң Алла алақанымызға 2 ұл салды. Көп балалы болғанның пайдасы – балалар көпшіл, мейірбан боп өседі. Не нәрсені де бөлісуге бейім. Медицинада дәлелденгендей, әйел босанған сайын 5 жылға жасарады. Қаны тазарып, денсаулығы жақсарады. Жас келіндерге баланы асырай алмаймын деп бала туудан қашудың қажеті жоқ. Себебі, әр баланың өз несібесі болады. Оның бір дәлелі – Сұлтанымыз туылғанда қайнағам басындағы үйін бізге босатып берді, – дейді отбасы құндылығын дәріптеуші.
ТҮЙІН
Өмірге бір нәресте келсе, оған сол отбасы ғана емес, бүкіл ауыл-аймақ, туған-туыс болып қуанып, шашу шашады. Жаңадан дүние есігін ашқан перзентке «бауы берік болсын» айтуды парызы есептейді. Ұл болса: «Айдарынан жел есіп, ат ойнатар ер болсын», деп жақсы қасиеттің даруын тілейді. Ал, қыз болса: «Жүзі айдай жарқырап, ауылға болсын өнеге» деп көрікті, ақылды болуына лебіз білдіреді. Халқымызда шарана туылысымен анасының жүрек тұсына жатқызылады. Ана жүрегінің дүрсілін естіген әрбір сәби келешекте мейірімді, бауырмал болып өседі.
Сәрсенкүл АҚКІСІ,
«Қармақшы таңы».