Көктеммен қауышу (өлең)

Ұмытып бәрін күйбеңнің,
Керемет бүгін күйге ендім.
Көктемді қалай ұнатсам -
Сұлуды солай сүйгенмін.Ғажабы қандай мауықтың,
Мас болып қалу – қауіп тым.
Сұлумен қалай сүйіссем –
Көктеммен солай қауыштым.Өкінткен талай өткен күз,
Болмайды өмір өктемсіз.
Кенелем қалай шуаққа,
Көгерем қалай көктемсіз?Жауында жылап қалған бақ,
Жүрекке солай салған дақ.
Қызғалдақ қызықтырса да –
Сарғайтқан мені сарғалдақ.Кетті ұзап ақ қыс – ақ әлем,
Арудың сәні ед қара мең.
Қалқа қыз қайта кезіксе
Моншақты алқа тағар ем.Өксиді өмір жалған боп,
Көңілде шіркін, арман көп.
Өзімді өзім жұбатам
Қызғалдақ бізден қалған деп.Солғындап көздің шырағы,
Самайдың қаулап тұр ағы.
Сонда да гүлдің жұпарын
Иіскегім келіп тұрады.