Жыл келеді
Жыл келеді ...
Жырға енеді жыл жаңа,
Ақ ұлпасын төсеп, Сырға, Қырға да.
Аймағымды аттап басқан қадамы
Құтты болсын! Тілегім сол – бір ғана.
Келген сәтте таянып,
Айқұшағын айқара ашпас қай Алып?
Қала берер естелік боп ескі айлар
Атаулы Күн алтын түске боялып.
Жыл дегенің – Жылнама!
Жеткеніме шүкір жаңа жылға аман!
Өтер жылға өкпе артпаймын десем де
Келер жылдың келбетінен сыр бағам.
Жетегінде – тәтті үміт,
Тышқан жылы әкелсін тек – жақсылық.
Алаңдарға жасыл шырша орнатып,
Адамдарға шаттық шамын жақтырып.
Сен де елеңдеп қарағым,
Қабырғаға қанша мәрте қарадың?
Өзің сынды мен де асыққам жыртуға –
Күнтізбенің ең ақырғы парағын.
Жыл – он екі ай – арасы,
Сағат тілі – ол да он екі, қарашы!
Тек мен емес , бұл мезетке ынтызар –
Күткен мұны күллі Адамзат баласы!
Достық ТІЛЕУБЕРГЕНОВ
