2018-ЖАҢА БАСТАУЛАР МЕН БАСТАМАЛАР ЖЫЛЫ БОЛҒАЙ

Осындай тәуелсіз, бейбітсүйгіш елде тұрып жатқанымызға Аллаға шүкірлік етемін. Басымыздан небір қиын-қыстау кезеңдер өтті. Бірақ соған мойымадық та шаршамадық. Қандайда бір жетістікке адал еңбегімізбен, елге, халыққа деген құрметімізбен жеттік. Қазіргі жастар да ерінбей, жалықпай ізденіп, еңбек етсе деймін. Еңбекпен қатайған қанаттың ешқашан мұқалмайтынын өмір өзі дәлелдеп келеді. Ал, білім-Алланың нұры. Жастарымыз білімді, Отансүйгіш, өнерлі, жігерлі болып жатса-Мәңгілік елдің іргесі берік болмақ.
130-дан аса ұлт бір шаңырақ астында тату-тәтті тұрып жатқан жер бетінде мемлекет жоқ. Бұл біздің Елбасымыздың кемеңгерлігінің, сара саясатыныңарқасы деп түсінгеніміз абзал. Қазақстандықтар тәуелсіздік аспаны астында 26 жыл өмір сүріп отыр. Ата-бабаларымыз ақ найзаның ұшымен, ақ білектің күшімен қызғыштай қорғаған ұлан байтақ жерімізді, бақытты елімізді бүгінде әлем жұртшылығы жақсы таниды.
Өткен жыл тамыры терең тарихымызды түгендеген, елі үшін еңіреп туған ерлер мен батырлардың рухын қайта жаңғыртқан жыл болғаны сөзсіз. Ауданда, облыста Тәуке ханның бас қолбасшысы болған Текей батыр Қарпықұлының 350 жылдығы кең көлемде аталды.
Енді есігімізден енгелі тұрған 2018 жылға тілегім-айдан-айға аман жетіп, жылдан-жылға дамып, гүлдене берейік,-дегім келеді.
Жаңа жыл-жаңа табыстар мен жаңа бастамалардың жарқын жылы болғай.

Пал БАЙМАХАНОВА,
«Қармақшы ауданының құрметті азаматы».