Ақ домбыра қолға алып
Тұрмағамбет ауылындағы №29 орта мектептің 6 сыныбында оқитын Арай Оңғарқызы 6 жасынан қолына домбыра ұстаған. Қаршадай қыз үлкен сахнаға аяқ басқалы 5-6 жыл болғанымен, дәстүрлі орындаушылардың республикалық және халықаралық байқауларында жүлде алып, халықтың ықыласына бөленіп үлгерді. Шынашақтай қыздың шежіреден сыр тартқан мақам-сазы өзіндік ерекшелікке толы. «Тасберген жырау» үйірмесіне келген кішкентай Арайдың талантын танып, сахнаға шығарған Зәуре Кәрібаева. Бүлдіршіннің қанатын қомдаған да осы кісі. Сыр сүлейлерінің сара жолын жалғаушы толғау-термелерді ғана емес, әйгілі «Көрұғлы» дастанын да көмейінде құйқылжыта жырлайды. Ол 8 жасында Алатаудың баурайындағы әсем қалада Елбасының алдында өнер көрсетіп, ақын Айдос Рахметовтің «Елін сүйген Елбасы» туындысын орындады. Талабына риза болған Нұрсұлтан Әбішұлы батасын беріп, домбыра сыйлады. – Бұл домбыра – мен үшін ең үлкен сыйлық. Елбасынан бата алу екінің біріне бұйырмайтын бақ, – дейді жыраулар ауылының титімдей жыршы қызы.
