ҚАРЫМЫ БӨЛЕК – «АЙҚАРАКӨЗ»

Аудандық мәдениет үйі жанындағы «Айқаракөз» би тобының құрыла бастағанына биыл үшінші жыл. Құрамында – 14 бишісі бар. Топқа кәсіби хореограф Сәния Молдабаева жетекшілік етеді.

Осы кезге дейін айтулы топтың бірқатар жетістікті еңсерді. Атап айтқанда, Нұр-Сұлтан қаласының 20 жылдық мерейтойына орай өткен «Таңғы шұғыла» атты республикалық өнер жарысында, сондай-ақ ауданда ұйымдастырылған «Тал­шыбық», «Бейбітшілік әлемі» атты халық­аралық байқауында бас жүлдені қанжығаласа, Байқоңырдағы «Все краски танцы» балалар мен жасөспірімдер арасында өткен би жарысында ІІ-ІІІ орындарды иеленген. Өткен жыл топ үшін аса сәтті болды деуге негіз бар. Өйткені, айтулы топ қатысқан қай жарыс та жеңіссіз емес. Соның бірі – Қызылордада өткен облыстық «Бозторғай» фестивалі. Мұнда да бишілеріміздің асығы алшысынан түсіп, «Көрермен көзайымы» номинациясына лайық деп танылды. Топ мүшелері аудан әкімінің қабылдауында болып, сый-сияпат алды.

Бүгінде «Айқаракөздің» репертуарында «Еркем», «Аққу», «Қуыршақтар», «Пеппи», «Көкке өрле», сонымен қатар, заманауи және өзге де ұлттардың билері бар.

Би тобы үшін тағы бір үлкен жаңалық – жақында ғана Қызылордада  ұйымдастырылған «Нұрлы жастар» республикалық жасөспірімдердің өнер бай­қауында «Хореография» номинациясы бойынша «Айқаракөз» би тобы жеңімпаз атанды. Гран-при иегерлері І дәрежелі диломмен марапатталып,  байқаудың лауреат атағын алды. Енді топ үстіміздегі жылдың 20-21-сәуірінде Алматыда өтетін «Нұрлы жастар» ІІ халықаралық өнер байқауында Сыр елінің намысын қорғайды.

– Би тобын осындай деңгейге жеткізген Сәния апайымызға, сонымен қоса, қыздарымыздың өнерге деген қызығушылығына қолдау көрсеткен аудандық мәдениет үйінің директоры Арнұр Көшенейге шынайы ризашылығымызды білдіреміз. Еңбектері жемісті, абыройлы болсын, – дейді ата-ана атынан лебіз білдірген Бағила Несіпбаева мен Балхия Исмағұлова.