ТЕРМЕШІЛЕР ТАРТУЫ
 | Қазақстан Республикасының Тәуелсіздік күні мерекесіне байланысты аудандық мәдениет үйінде К.Рүстембеков атындағы жыраулар үй шәкірттерінің «Тәуелсіздікке тарту» атты есепті концерті өтті. Оны жыраулар үйінің директоры, Серік Жақсығұлов жүргізді. |
Шараның ашылу салтанатында жыраулар үйі директорының орынбасары Бидас Рүстембекұлы, «Рүстембек жырау» үйірмесінің жетекшісі – Балтабай Бедебаев, «Базар жырау» үйірмесінің жетекшісі – Берік Аққалиевтар жыр моншағын төкті. Аға буын өкілдерінен соң жас жыршы-термеші Артур Шалқарұлы, Гаухар Ахметова, Диас Оңғарұлы, Нұрсұлтан Төреханов, Шұғыла Мархабатова, Арай Оңғарқызы, Ұлдана Ахметова, Меруерт Ұзақбаевалардың өнері тамашаланды. Сондай-ақ, айтулы концертте «Жыр жауһары» фольклорлық ансамблінің орындауында «Көксерек», «Әлқисса», «Тәлім» шығармасы тыңдалса, жыраулар үйінің түлектері Ақсұңқар Бүркітбай, Малика Алдамжарова, Жұлдызай Тұрлығұлова, Тоғжан Бақытова, Руслан Өтегенов, Алмат Азаматовтардың да жыр-термесі көрерменнен жоғары бағасын алды. Бір айтарлығы концерт қонағы – «Мен қазақпын» республикалық мегажобасының жеңімпазы Күнсұлу Түрікпен мен елімізге танымал кәсіби қобызшы Марат Сүгірбай жырдан шашу шашты.
Сәрсенкүл ЖАУДАТБЕК
