Журнал аты – «Рухани жаңғыру»
Адам жанының алтын арқауы – рухани құндылық. Сол рухани құндылықтарымызды дәріптейтін, салмақты сараптамалар мен бай мазмұнды қамтитын «Рухани жаңғыру» атты республикалық журнал жарық көрді.
Басылымның тұсаукесері Талдықорған қаласында өтті. Жаңа басылымның ұстанған бағыты – құндылықтарымызды дәріптеу, мәдениетімізді, әдебиетімізді зерттеп, зерделеп жария етуге мол мүмкіндік жасау. Журналда ақпараттық материалдар мен күнделікті хабарламалар басылмайды, тиісінше, руханият пен тарихқа қатысты құнды, ұрпаққа ой салар тың сараптамалар қамтылмақ. «Рухани жаңғыру» журналының редакциясы – Талғар ауданында. Бас редакторы – Бахтияр Қабасов.
– Тарихымызды таразылап, төл мәдениетімізді қайта жаңғыртуға тың серпін берген Елбасымыздың «Болашаққа бағдар: рухани жаңғыру» мақаласы негізінде жаңа басылым – жаңа идеямен жарыққа шықты. Мемлекетіміздің жаңғыру жолындағы жетістіктері мен жеңістерін, еңбекке үлгі болған жандардың ұстанымдары, көне көрікті қалаларымыз бен тарихи ескерткіштеріміз, мәдени мұраларымыз жайлы жан-жақты мағлұмат ала аласыздар, – деді Б.Қабасов.
Сонымен қатар «100 жаңа есім», «Қасиетті Қазақстан», «Туған жер», «100 жаңа оқулық» жобаларының кейіпкерлері осы басылым арқылы жасап жатқан іс-тәжірибелерін халықпен бөлісе алады. Алдағы уақытта еліміздің әр өңірінде «Рухани жаңғыру» журналының таныстырылымын өткізу жоспарланып отыр.
Жан ЕРКЕ
