«Жүз шайыр» шыққан қасиетті мекенімізге биыл – 90 жыл. Отанымыздың ажырамас бір бөлшегі саналатын ауданымыз осынау кезеңде, жүріп өткен жолдарында небір күрделі қиыншылықтарды, қалыптасу мен өрлеу кезеңдерін бастан кешті. Соған қарамастан, әлі де болса еңсесі биік, тамыры терең. Тоқсан жылдық тарихы бар Қармақшымызды дәріптеу біздің- парызымыз.
Жуырда осы мерейлі мереке аясында Жосалы кентінің орталық алаңында Т.Көмекбаев, Қуаңдария, Алдашбай ахун ауылдық округтерінің мәдениеті мен өнер күніне орай «Ән-жырым, саған, Туған ел» атты мерекелік концерті өтті.
Қызылорда қаласының 200 жылдығы және Қармақшы ауданының 90 жылдық мерейтойына арналып ұйымдастырылған концертте ауылдық округтердің көркем өнерпаздары Қармақшы ауданының тарихы жайлы сахналық көріністер қойып, ән мен жырдан шашу шашып, аудан тұрғындарына мерекелік көңіл күй сыйлады.
Бір өкініштісі, айтулы мереке аясындағы ұйымдастырылған концертті ат төбеліндей көрермен тамашалады.
Үш ауылдың өнерпаздарының мерейлі мереке үшін тарту жасау мақсатында тертөге дайындалғаны көрініп-ақ тұр. Бірақ тамашалайтындардың аз болғаны еңбектің бағаланбағанындай әсер етті.