АУДАН ӨНЕРПАЗДАРЫНАН СЫР ЖҰРТШЫЛЫҒЫНА ТАРТУ

Орталық алаңда өткен ауқымды мәдени іс-шарада жыраулық өнердің алтын бесігі саналатын Қармақшы топырағының төл өнері мен тарихи-мәдени мұрасы кеңінен насихатталды. Аудан қолөнершілері ұлттық нақыштағы бұйымдарын көпшілік назарына ұсынып, дәстүр мен заманауи стильдің үйлесімін таба білген қолөнер туындылары көрмеге қойылды.

Шара шымылдығы ауданымыздың жыраулық тарихынан сыр шертетін театрландырылған көрініспен ашылды. Қобыздың күңіренген үні мен жыршының шынайы сөзі көрерменді терең әсерге бөлеп, сахна рухани кеңістікке айналды.

Мерекелік кешке «AMANAT» партиясы Қызылорда облыстық филиалының төрағасы Алмасбек Есмаханов, Қазақстанның өнер қайраткері, Қармақшы ауданының құрметті азаматы, ақын Серік Ыдырысов, аудан әкімінің орынбасары Самат Смағұлов арнайы қатысып, Сыр елінің айтулы мерекесімен құттықтап, аудан өнерпаздарына өз алғыстарын білдірді.

Сахна төрінде «Қорқыт» домбырашылар ансамблі, «Ақ Әжелер», «Айқаракөз» топтары, сондай-ақ ауданның жас әншілері мен бишілері өнер көрсетіп, көрерменнің ыстық ықыласына бөленді. Терме мен толғау, ән мен күй арқылы ата-баба аманаты ұлықталып, Сыр еліне тән рух пен сырлы сарын көрініс тапты.

Кеш мазмұны тек сахналық қойылым мен дәстүрлі өнерімен ғана шектелмей, көңілді кештің шырайын ашқан Қармақшының жайдарманшылары да сахнаға көтеріліп, ұлттық болмысқа негізделген тапқыр әзілдерімен көрермен көңілін серпілтті. Жастардың шынайы тапқырлығы мен сахна мәдениеті көпшілік тарапынан ерекше қошеметке ие болды.

Ауданның өнер ұжымы Қызылорда қаласының ғасырлық торқалы тойына орай рухани тереңдікке, тарихи тағылым мен шынайы қуанышқа толы мазмұнды концерттік бағдарлама ұсынды. Жыр мен күлкі, күй мен көркем бейне тоғысқан бұл кеш қала тұрғындары мен қонақтарына ерекше рухани серпін сыйлады.