ЖАС БИШІЛЕРДІҢ ЖЕҢІСІ – АУДАН МАҚТАНЫШЫ

Аудан әкімінің орынбасары Самат Қыдырбекұлы Түркістан қаласында өткен «Dance Battle» халықаралық би байқауында жеңімпаз атанған жас бишілерді салтанатты түрде қабылдап, марапаттады.

Жеңімпаздарды би өнеріне баулып, ерекше нәтижеге жеткізген аудандық оқушылар үйінің хореографы Жадыра Өміртайқызына ризашылығын білдіріп, аудан әкімінің алғыс хатын табыстады.

Естеріңізге сала кетейік, байқауға еліміздің түкпір-түкпірінен 82 топ қатысып, жас ерекшеліктеріне қарай сынға түсті. Біздің өнерпаздар «Қазақ биімен» І орынды жеңіп алса, «Орыс биі» бойынша SUPER VIP GRAND PRIZE номинациясын иеленіп, Дубайға жолдама ұтып алды.

Сонымен қатар, 6-7 жас аралығындағы бишілер «Хулиганки» биімен SUPER VIP GRAND PRIZE номинациясына ие болып, 50 мың теңгелік ақшалай сыйлық ұтып алды.

Жадыра Өміртайқызының еңбегі ерекше аталып өтіп, ол «Үздік жетекші» номинациясын жеңіп алып, Корей еліне тегін жолдама иеленді.

Марапаттау рәсімінде жас өнерпаздардың ата-аналары сөз сөйлеп, балаларға ерекше қолдау көрсетіп, шабыт сыйлаған аудан басшылығына және хореограф Жадыра Өміртайқызына шын жүректен ризашылықтарын білдірді.