26-27 қыркүйек күндері Алматы қаласында халықаралық «Бозторғай» балалар шығармашылық байқауы өткен-ді. Сол додада біздің балдырған түркітілдес халықтар арасында өнерін ортаға салуға келген 100-ге тарта өреннің ортасынан оқ бойы оза шапты. Дарындылар ішінен дараланған өнерпаздың есімі – Мәди. Ол Алдашбай ахун ауылындағы №111 орта мектептің 7-сыныбында тәлім алады. К.Рүстембеков атындағы Жыраулар үйінің Алдашбай ахун ауылында орналасқан «Ешнияз сал» үйірмесінің шәкірті. Үйірме жетекшісі – жас та болса біршама белесті бағындырып жүрген жырау Әлішер Мырзағалиев. Шәкірттің әрбір жеңісі ұстаз еңбегінің жемісі емес пе? Оқушысы жайлы жетекшіден пікір алдық.

– Биыл 7-сыныпқа аяқ басқан Мәди Елдес – менің талантты, ерекше дарыны бар мықты шәкірттерімнің бірі. «Ешнияз сал» үйірмесінде білім алатын ол көптеген байқауда топ жарып, аудан намысын қорғап келеді. Бүгінде шәкіртімнің жарқын жетістіктерін зор мақтанышпен айтамын. Біздің бағыт – халықтық орындау. Байқаудың алғашқы кезеңінде Тұрмағамбет Ізтілеуұлының «Тәлім» термесін орындаса, ІІ кезеңде Дүр Оңғар Дырқайұлының «Ерлерім сөйле дегесін» термесін көпшілік назарына ұсындық. Нәтижесінде халықаралық «Бозторғай» байқауында бас жүлде иегері атанды. Өзінің бойындағы ерекше талантымен талайды тамсандырған шәкіртім Бакудегі байқауда еліміздің абыройын асқақтатып, жүлделі орынды алған едік. Мәди болашағынан зор үміт күттіретін жас өнерпаз. Талантты өнерпаздың болашақта биік белес пен шыңдардан көрінуіне зор сенім мен үміт артамын, – дейді жетекшісі Әлішер Мырзағалиев.

Аудан өнерін алға жетелеп, талай талантты жастың шығармашылығын шыңдап жүрген білікті маманның еңбегі әркез бағалы. Жаңашылдықтың үлгісін көрсетіп, қазақтың киелі домбырасы мен жыр өнерін дәріптеп жүрген жас талант иесі мен шәкіртінің жеңісі бүгінде көпке үлгі. Өнерлі жас – еңселі ел ертеңі екені айтпаса да түсінікті.