Поэзия! Менімен егіз бе едің?

Бүгін саф өлеңнің жүйрігі, ақиық ақын, қазақ поэзиясының мұзбалағы, Мұқағали Мақатаевтың туған күні аудандық Көшеней Рүстембеков атындағы Жыраулар үйінде "Поэзия, менімен егіз бе едің..." деген тақырыппен аталып өтті. Әдеби-сазды поэзиялық кеш прологпен Мұқағалидың ой үстінде өлең шығаруы, өз қиялымен арпалысы сахналанды.

Поэзия кешінің шымылдығын ақын, Гүлжанат Дүзенова және Сырым Әділбековтер арнау жырмен ашып, жас жыршы Руслан Өтегенов пен Әлішер Мырзағалиевтер ақынның сөзіне жазылған әндерді тыңдарман жүрегіне жеткізе білді. Мұқағали тойында поэзия сүйер көрермендер де ақын өлеңдерін жатқа әсерлі оқып, белсенділік танытқаны көңіл қуантты. Сонан соң аудан өнерпаздары Махамбет Мадияр ақынның асқақ өлеңдерін оқыса, "Тұрмағамбет" атындағы ақындар үйірмесінің жас шәкірттері "Мұқағалиша" жырлады. Шара соңында Шакизада Ғалымжан әннен шашу шашты. Сезім кешінің құрметті қонағы ардагер ұстаз Қаратаева Райкүл апай және ақын, Сәрсенкүл Жаудатбекқызы кештен алған әсерлерімен бөлісіп, өз алғыстарын айтып, кешті қорытындылады.

Өлтіре алмас, алайда өлеңді ешкім,- деп ақынның өзі айтқандай, оның өлеңі өмірден өзі кетсе де, өшпей жалғасын тауып келеді, таба бермек...