qarmaqshy-tany.kz «Ұлттық рухани жаңғыру» бағдарлама аясында, аудан әкімдігінің қолдауымен, Сыр сүлейі, даңғайыр жырау Сәрсенбай Бөртебайұлының ұрпағы, жырау Алшынбек Сәрсенбайұлының 80 жылдығына арналған «Жасымнан жақсыларға жүрдім жақын...» атты облыстық жыршы-жыраулар фестивалі болып өтті.

Жыр кешін аудандық мәдениет және тілдерді дамыту бөлімінің басшысы Ержанов Дәурен Дауылбекұлы жырауларға сәттілік тілеп, құттықтады. Сыр сүлейлерінің ізбасары, жырау Алшынбек Сәрсенбаевтың өмірі мен шығармашылығына орай ұйымдастырылған облыстық жыршы- жыраулар фестиваліне Ақмешіт ордасынан ат терлетіп «Ерен еңбегі үшін» медалінің иегері, жырау Ахметов Руслан, Қорқыт ата мұраларын насихаттаушы, жырау Сүгірбай Марат, Жақсан жыраудың ұрпағы, жас жыршы – Жәнібек Жақсан, Алшынбек жыраудың төл шәкірті, айдынды Аралдан келген жыршы Гүлжамал Бейісова, ақжарлық жырау, Жыраулар үйінің үйірме жетекшісі – Балтабай Бедебаев, Балқы Базардың ұрпағы Оразалы Әлішбеков және жыраудың ұрпақтары Майра Сәрсенбаева, Жауһар Сәрсенбаевалар жыраулық дәстүрдің үздік үлгісін көрсетті. Шара соңында барлық қатысушы жырауларға арнайы аудан әкімінің алғыс хаты табыс етілді.