Сүлейлер салған ізбенен...

Ерден мен Қосжан сойырғас,
Орынсыз жерге бой ұрмас.
Алқалап атты қойғанда,
Асуда болса тайынбас

(Ә.Жұматаев)

Бүгін Шәмшат Төлепова атындағы мәдениет үйінде Көшеней Рүстембеков атындағы Жыраулар үйінің ұйымдастыруымен

Сыр сүлейлерінің мұрагер ұрпағы Қосжан жыраудың бел баласы Сыр өңіріндегі жоғалып бара жатқан дәстүрлі жыраулық өнердің насихаттаушысы, жырау – Қасарбек Қосжанұлының 60 жылдық мерейтойы облыстық деңгейде аталып өтті.

Мерейтой иесіне арналған арнау жырмен ақын Сырым Әділбеков кеш шымылдығын ашты. Аудан әкімінің құттықтау хатын аудандық мәдениет және тілдерді дамыту бөлімінің басшысы Ержанов Даурен Дауылбекұлы табыстап, Қасарбек Кәрібаевтың иығына бөрікті шапан жапты. Ел ағалары Бидас Үрістембеков пен Қуантай, Шаймерденов Зал құттықтау лебіздерін білдірді. Жыр кешінің жүргізілу тізгіні ақын-жыршы Марат Сүгірбайға табысталып, Нартай жыр мектебінің өкілі Ақмарал Ноғайбаева, ақын-жыршы Әділхан Қуаңбаев, Қосжан жыраудың қызы Зәуре Кәрібаевалар жырдан шашу шашты.

«Тұлпардың тұяғы, алтынның сынығы, қас жыраулардан қалған көз» деп баға берген, бүгінге 3 ұлынмен 3 ұлысты елдің басында жүрген, жарына жайсаң отағасы болып, немерелеріне қамқор ата бола білген Қасарбек Кәрібаев ағамызды қаншалықты, қандай деңгейде ұлықтасақ та лайықты.