Өнерлі отбасы фестивалі
Бейсенбіде аудан әкімдігімен қолдауымен Ш.Төлепова атындағы аудандық мәдениет үйінің ұйымдастыруымен Қазақстандағы отбасы күні мерекесіне орай «Бақытты отбасы – бақытты ел!» атты аудандық өнерлі отбасылар фестивалі өткізілді.
Мемлекет мерейінің биік болуы қашанда отбасының ынтымақ-бірлігіне тікелей байланысты. Келешегіміздің жарқын болып, алға қойған мақсаттарға жетудің кепілдігі де жанұядағы өзара түсіністік пен татулық тамырының тереңге бойлауында екені анық. Сондықтан елімізде өнегелі құндылықтарды жаңғырту мен отбасы мәртебесін арттыру мақсатында өткізілген фестивальге 14 ауылдық округтен өнерлі отбасылар қатысып, өз өнерлерін көрсетті. Аталмыш фестивальде аудандық мәдениет және тілдерді дамыту бөлімінің басшысы Дәурен Ержанов өнерлі отбасыларды құттықтап, ыстық лебізін білдірді. Фестиваль соңында өнерде де, өмірде де тағдырлары бір арнаға тоғысқан отбасыларға дипломдар мен бағалы сыйлықтар табысталды.
