Аудандық ішкі саясат бөлімінің қолдауымен «Қармақшы Жастары» Жастар қоғамдық бірлестігі, аудандық мәдениет үйі, Қызылорда облыстық «Ұрпақтан ұрпаққа» қоғамдық бірлестігінің Қармақшы аудандық филиалының ұйымдастыруымен «Бақытты отбасы – бақытты ел!» атты өнерлі отбасылар фестивалі өтті.

Өнегелі отбасы – бұл, тәлім-тәрбиесі, қалыптасқан қағидасы бар, береке-бірлігімен, асыл қасиеттері арқылы өзгеге өнеге болар шағын мемлекет. Отан – от басынан басталатынын ескерсек, алдымен Отанды құрайтын отбасы мықты болуы шарт. Ол үшін отбасылық құндылықтарды мемлекеттік деңгейде жандандыру, үлгілі отбасыларды насихаттау жұмыстары жолға қойылуы қажет. Осы мақсатта 2013 жылдан бастап Н.Ә.Назарбаевтың Жарлығымен қыркүйек айының екінші жексенбісі – Отбасы күні болып жарияланды.

Мемлекет мерейінің биік болуы қашанда отбасының ынтымақ-бірлігіне тікелей байланысты. Келешегіміздің жарқын болып, алға қойған мақсаттарға жетудің кепілдігі де жанұядағы өзара түсіністік пен татулық тамырының тереңге бойлауында екені анық. Сондықтан-да, елімізде өнегелі құндылықтарды жаңғырту мен отбасы мәртебесін арттыру мақсатында аудандағы өнерлі отбасылар фестивалі өткізіліп, 8 өнерлі отбасы өнерлерін ортаға салды.

Барлық қатысқан өнерлі отбасылар аудан әкімінің орынбасары Е.Меңлібаевтың алғыс хатымен және бағалы сыйлықтарымен марапатталды.