Қызылорда қаласында өткен облыстық «Мемлекеттік қызмет аруы» байқауына Қармақшы ауданынан қатысқан жетекші маман Рауабану Қарекеева жүлделі 2-орынды иеленді.

Еліміз бойынша алғаш рет өткізілген мемлекеттік қызметшілер арасындағы нәзік жандылардың байқауы «23 маусым - Мемлекеттік қызметші күні» кәсіби мерекесіне орай ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаментінің ұйымдастыруымен өтті. 

Байқауға қатысушы арулар «Менің таңдауым мемлекеттік қызмет» бейнебаяндар арқылы өздерін таныстырып, «Қызды тәрбиелеген – ұлтты тәрбиелейді» даналық сөздердің мағынасын ашу, «Өнер» және «Тақырыптық қойылым» секілді, 4 кезең бойынша бақтарын сынады.

Қатысушылар ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің Қызылорда облысы бойынша департаменті басшысының дипломымен және бағалы сыйлықтармен марапатталды.

Статистикалық мәліметке сәйкес, Сыр елінде 1657 азаматша мемлекеттік қызметте еңбек етуде. Аймақтағы барлық мемлекеттік қызметшілердің 44,6 пайызын әйелдер құрап отыр.Олардың 749-ы жергілікті атқарушы органдарда, ал, 908-і орталық атқарушы органдардың құрылымдық бөлімшелерінде қызмет етеді.

Қармақшы ауданы әкімінің баспасөз қызметі