Билер кеңесі көмегімен отбасы сақталды

Қармақшы аудандық сотында неке бұзу туралы азаматтық іс билер кеңесінің көмегімен медиация келісімі жасақталуына байланысты тоқтатылды.

Алдын-ала тыңдау кезінде төрағалық етуші судьяның ұсынысымен тараптар Билер кеңесіне жүгінді. Билер кеңестерінің мүшелері өздерінің өмірлік тәжірибелеріне сүйеніп, тараптарды татуластыру жолымен отбасы ішінде туындайтын дауларды шешуге көмектесті. Олар ерлі-зайыптыларға отбасы құндылықтары мен бала тәрбиесіндегі ата-ананың рөлін, маңыздылығын түсіндірді.

Билердің ақылы мен батасын алған ерлі-зайыптылар өзара татуласып, Билер кеңесінің мүшелеріне алғыстарын білдірді.Осылайша тағы бір отбасы сақталды.Ұйғарым заңды күшіне енген жоқ.

Қайнар: 

Қармақшы аудандық сотының баспасөз қызметі