Бүгін Қармақшы ауданында Ұлы Жеңістің 74 жылдық мерекесі аталып өтті.

Аудан орталығындағы «Тағзым» алаңында гүл шоқтарын қоюдан бастау алған іс-шаралар орталық алаңда жалғасын тапты.

Салтанатты шараларға аудан әкімі Мақашов Сұлтан Ысқақұлы қатысып, құттықтау сөз сөйлеп ізгі лебізін жеткізді.

Соғыс және еңбек ардагерлері "Тағзым" алаңына гүл шоқтарын қойып, майдан даласында құрбан болған боздақтардың рухына арнап ауданның бас имамы Құран бағыштады.

Қармақшы ауданынан Ұлы Отан соғысына 5 мыңға жуық азамат аттанып, жартысынан көбісі Туған жерге оралмаған.

Орталық алаңда жалғасқан салтанатты шарада патриоттық әндер шырқалып, көріністер көрсетілді.

Аудан өнерпаздарының арнайы дайындаған концерттік бағдарламасы жиналған жұртшылыққа көтеріңкі көңіл – күй сыйлады.

Отанымызды қорғап қалған батырларымыздың теңдессіз ерліктері еш ұмытылмақ емес, жоғары деңгейде ұйымдастырылған шаралар бүгінгі ұрпақтың бойында патриоизмнің үлгісін қалыптастырады.

Қармақшы ауданы әкімінің баспасөз қызметі