Қазіргі уақытта Қазақстан Республикасындағы сот жүйесінде барлық қызмет түрлерін пайдалана отырып, сотқа баруды қажет етпей-ақ, онлайн тәртібінде сот мәжілісіне қатысуға болады.

Қармақшы аудандық сотында бір күн ішінде «Виртуалды сот» пилоттық жобасы аясында Қазақстан Республикасының Әкімшілік құқық бұзушылық туралы Кодекстің 73-1 бабының 1-бөлігімен қозғалған әкімшілік істер қаралды.

Азаматтар А.,Е.,Н. Қармақшы ауданы, Төретам кенті, Шүкіров көшесі №18 үйдің ауласында жәбірленуші С.-ны ұрып-соғып, денсаулығының қысқа уақытқа бұзылуына немесе жалпы еңбек қабілетін тұрақты түрде болмашы жоғалтуға әкеп соққан денсаулыққа қасақана жеңіл зиян келтірген.

Іс бойынша жәбірленуші М. және азаматтар А.,Е.,Н. Төретам кенті әкімшілік ғимаратында сот мәжілісіне бейнеконференцбайланыс арқылы қатысты. Сотта әкімшілік құқық бұзушылық туралы іс қозғалған тұлғалар А.,Е.,Н. кінәлерін толық мойындап, қазіргі уақытта жәбірленуші С.-дан кешірім алып, медиация бойынша бітімгершілікке келгендерін бекітті.

Соттың қаулысымен әкімшілік құқық бұзушылық туралы іс қозғалған тұлғалар А.,Е.,Н. әкімшілік жауаптылықтан босатылып, әкімшілік іс жәбірленушімен медиация арқылы бітімгершілікке келуіне және ҚР ӘҚБтК-нің 64 бабына сәйкес өндірістен тоқтатылды.