ӘЙЕЛ- АНАҒА ҚҰРМЕТ КӨРСЕТТІ

Ұлыстың ұлы күнінде «Қармақшы ата» мешітінде Қазақстан Мұсылмандары Діни басқармасы Қызылорда облысы бойынша өкілдігінің әйелдер-қыздар секторының меңгерушісі Ләззат Сыдықова жергілікті нәзік жандармен кездесті.

Оған аналар, қыз-келіншектер қатысты. Дін өкілі әйел жамағатына «Ислам дініндегі ұят» тақырыбында уағыз айтып, қатысушы тарапынан берілген сұрақ-сауалға жан-жақты жауап қайтарды. Басқосуда қажы ана Күлән Ибраимова қыз-келіншектерге қасиетті Меккенің зәм-зәм суынан ішкізіп, ақ батасын берді. Шарада мерекелік дастархан жайылып, дәмнен ауыз тиілді. Сондай-ақ, тұрмысы төмен, көпбалалы 10 отбасына азық-түлікпен қайырымдылық шарасы ұйымдастырылды.

– Мақсат – Наурыз мерекесінде әйел-аналарға құрмет көрсету, – дейді мешіттің бас имамы Жақсыбек қажы.