Жастар саясаты: Елбасы Нұрсұлтан Назарбаевтың «Қазақстандықтардың әл-ауқатының өсуі: Табыс пен тұрмыс сапасын арттыру» атты Қазақстан халқына Жолдауында келер жылды «Жастар жылы» – деп атап көрсетті. Бұл бастама жастарға берілген зор мүмкіндік. Оларға артылған үлкен сенім. Өңірде де жастар саясаты жақсы жүйеге қойылған. «Қармақшы аудандық жастар ресурстық орталығы» коммуналдық мемлекеттік мекемесінде 6 қызметкер жұмыс жасауда. Мекеме бюджеті 2018 жылы 9 млн. теңгені құрады. Аудан бойынша 14-29 жас аралығында – 12 342 жас бар. Жалпы жастар халықтың 22,8 пайызын құрап отыр. Биыл «Жас­тар корпусын дамыту» жобасы бойынша Қармақшы ауданынан 27 жоба ұсынылып, 13 жоба жеңімпаз болып танылды. Аудан бойынша 13 жобаға 42 жас қатысты. Оның ішінде, ауыл шаруашылығы саласы бойынша – 3 жоба, ұлттық қолөнерді дамыту бойынша – 5 жоба, балалар ойын-сауық орталығы – 2 жоба, тамақ өнімдері – 2 жоба, сән салоны – 1 жоба.

Өздеріңіз білесіздер, аудандар арасында алғаш болып жастардың бос уақытын тиімді пайдалануға арналған екі «КОВОРКИНГ» орталығын ашқан болатынбыз. Келер жылы 5 ауылдан осындай орталықты ашуды жоспарлап отырмыз. Жастардың өзін-өзі басқару жүйесін жетілдіру мақсатында жыл аяғына дейін ауданымызда оқушылар және жастар мәслихаттары құрылды. Кәсіпкер боламын деуші жастар үшін Қорқыт ата атындағы ҚМУ-нің «Бизнес-старт» бизнес-инкубатор орталығымен бірлесіп «Стартап-Бизнес» инкубаторы өз жұмысын бастайды, бизнес идеялар байқауы мен жәрмеңкелерін ұйымдастырып, ауданның жас кәсіпкерлерінің форумымен қорытындыланатын болады.