ТӘЛІМІ БӨЛЕК КЕЗДЕСУ
Жуырда Омар Шораяқұлы атындағы №30 орта мектеп пен Ахметжан Жанпейісов атындағы №105 және КСРО Батыры Тәйімбет Көмекбаев атындағы №250 орта білім беру ордаларында оқушылар қармақшылық желтоқсаншылармен кездесу өткізді.
Шарада мектеп басшылары Бауыржан Дүйсенбаев пен Гүлжаһан Мұнарбаева, Гүлзира Еркебаева және аудандық білім бөлімінің әдіскері Ақтолқын Тоқшылықовалар қонақтар мен оқушыларды төл мерекемен құттықтап, Желтоқсан оқиғасының қазақ ұлтына әкелген қасіретіне, қазақ жастарының билікке қарсы өткізген бейбіт шеруі барысында көрсеткен ерлікті істеріне, сондай-ақ тәуелсіздік аясында аудан халқының әлеуетін арттыруға байланысты атқарылған жұмыстарға тоқталды. Ұстаздар қауымы мен шәкірттердің биылғы оқу жылында қол жеткізген жетістіктері жайлы әңгіме өрбітті.
Содан соң кеш қонақтары, 1986 жылдың 17-18-желтоқсанында Алматы қаласындағы орталық алаңда қазақ жастарының КСРО Үкіметінің солақай саясатына қарсы шыққан жерлестеріміз Мұхит Қыпшақбаев, Айдос Ниязова, Аманкүл Рысбаева, Жұмагүл Тобжанова, Ақжамал Бұйрабаева және оқиға куәгері Қорқыт ата мемориалдық кешенінің ғылыми қызметкері Мағауия Әлиевтер оқиға жайлы естеліктер айтты.
Нұрбай ЖАНӘДІЛОВ,
«Қармақшы таңы».
