ЕЛБАСЫНЫҢ БАТАСЫН АЛҒАН АЙДАНА
Байқоңыр қаласындағы №272 орта мектеп ұжымы озық тәжірибесімен ауданға танылған білім ордасының бірі. Әрдайым ізденісте жүретін мектеп ұстаздарының тынбай еткен еңбегінің арқасында көптеген шәкірт аудандық, облыстық, тіпті республикалық пәндік олимпиада мен басқа да шараларда топ жарып жүр. Сондай талапты шәкірттердің бірі – 10 сынып оқушысы Айдана Ғалымжанова.
«Білімді мыңды жығар» деп дана халқымыз айтқандай, жас та болса, өзінің білімділігімен, талаптылығымен шәкірттер арасында ерекшеленген Айдана ұстазы, орыс тілі және әдебиеті пәнінің мұғалімі Шынзадай Халлаеваның болашақта үлкен үміт күтетін шәкіртінің бірі. Жас дарын ұлағатты ұстазының тынымсыз еңбегінің арқасында көптеген белесті бағындырды.
– Айдананы 5-сыныптан бастап түрлі білім сайысына қатыстыра бастадым. Еңбектің жемісі бірден келмегенімен, білімге құштар шәкіртімнің ізденімпаздығының арқасында уақыт өте қалалық, аудандық, облыстық пәндік олимпиадалар мен байқаулардан жүлделі орындарды иелене бастады. Атап айтар болсақ, бұған дейін өткен бүкілресейлік «Олимпис – 2015» орыс тілі мен әдебиеті пәнінен қашықтық конкурсында І орын иесі атанған Айдана өткен оқу жылында облыс бойынша өткізілген пәндік олимпиадада бас жүлдені жеңіп алса, сол жылы Қостанай қаласында өткен республикалық қоғамдық-гуманитарлық пәндер олимпиадасында жүлделі ІІІ орынды иемденді. Расында да, «Шәкірт – ұстаз айнасы» дегендей, Айданадай жас білім білгірі менің мақтанышым, – дейді ұлағатты ұстаз.
Мектеп директоры Мира Оспанова да шәкірті туралы өз пікірін жеткізді.
– Мектебімізде дарынды оқушылар жеткілікті. Олардың арасында өз сүйіп оқитын пәннің білгірлері, қолөнер шеберлері, спорт түрі бойынша дарындылар да жетерлік. Десе де, Айдана мектептегі озат оқушылардың көшбасшысы. Ол өзінің дарындылығымен сабақта озат оқушы болып қана қоймай, қоғамдық жұмыстардың да белсенді мүшесі. Жуырда, яғни қазан айында Айдана Ақтөбе қаласында еліміздің әр аймағынан жиналған дарынды оқушылардың қатысуымен өткен «Бақытты бала» атты республикалық форумына қатысып қайтты.
Міне, сол форумға Елбасы, ел жастарының қамқоршысы Нұрсұлтан Назарбаев та қатысып, жастар алдында сөз сөйлеген еді. Сондай-ақ, форум барысында Мемлекет басшысы әр өңірден қатысқан дарынды жастармен кездесіп, түрлі тақырыпта әңгіме өрбітті. Кездесуге шәкіртіміз Айдана Ғалымжанова да қатысып, Елбасымен дидарласты. Ақыл-кеңесін тыңдап, батасын алды, – дейді мектеп басшысы.
Нұрбай ЖАНӘДІЛОВ,
«Қармақшы таңы».
