Мемлекет басшысы «КИМЭП университеті» акционерлік қоғамының президенті Чан Йан Бэнгті қабылдады. Кездесу барысында Нұрсұлтан Назарбаевқа КИМЭП университетінің қазіргі жұмысы мен осы оқу орнын дамыту жоспарының іске асырылуы жөнінде мәлімет берілді.

Елбасы қазіргі заман экономикасының талаптарына сай білікті мамандар дайындаудағы университет жұмысының тиімділігін атап өтті.

– Оқу ордасы 1992 жылы құрылған. Осы жылдар ішінде 12 мыңға жуық студент бітіріп шықты. Бүгінде мұнда әлемнің әртүрлі елдерінен келген оқытушы-профессорлар құрамы еңбек етеді. 29 білім бағдарламасы бойынша 2109 студент ақылы негізде оқып жатыр. Бұл – зор жетістік, – деді Елбасы.

Ч.Бэнг университет түлектерінің 93 пайызы оқу бітірген соң 6 айдың ішінде жұмысқа орналасатынын айтты. Сонымен қатар, акционерлік қоғамның президенті биыл оқу орны Білім беру сапасын қамтамасыз ету жөніндегі тәуелсіз агенттіктің тұжырымы бойынша ғылым және білім саласын дамыту ісінде үздік деп танылғанын атап өтті.