Қар жауып, көктайғақ болады: синоптиктер 8 қарашаға болжам жасады
Синоптиктердің мәліметінше, жексенбі күні елдің басым бөлігінде қар аралас жаңбыр жауады. Батыс, солтүстік-батыс және солтүстік өңірлерде жаңбыр мен қар жаууы мүмкін, деп хабарлайды Egemen.kz.
Елдің оңтүстік-шығысында жауын-шашынсыз ауа райы сақталады. Республика бойынша жел күшейіп, түнде және таңертең тұман түсуі ықтимал. Солтүстік-батыс, солтүстік және шығыс өңірлерде көктайғақ болады.
Сонымен қатар бірқатар өңірде өрт қаупі жоғары деңгейде сақталады. Мұндай қауіп Атырау облысының солтүстік-батысында, Алматы облысының батысы, оңтүстігі мен шығысында, Жетісу облысының оңтүстігі мен орталығында, Қызылорда облысының солтүстігінде, Жамбыл облысының солтүстігі, оңтүстігі мен шығысында, Қостанай облысының оңтүстік-батысында, Түркістан облысының батысы мен солтүстігінде, сондай-ақ Абай облысының оңтүстігінде болжанып отыр.
Ал Қызылорда облысында, Ақтөбе облысының оңтүстігі мен шығысында, Қарағанды облысының батысында және Жетісу облысының шығысында өрт қаупі төтенше деңгейге жетуі мүмкін.
