«GREEN ARAL: VOLUNTEERS FOR LIFE 2026»: ШИЖАҒА ТӨРІНДЕГІ ТАҒЫЛЫМДЫ САПАР

Бүгін «GREEN ARAL: VOLUNTEERS FOR LIFE 2026» халықаралық волонтерлер апталығының қатысушылары Арал ауданындағы Шижаға ауылдық округіне арнайы экскурсия жасап, өлкенің табиғи көркемдігімен, ауылдың тұрмыс-тіршілігімен және қазақ халқының салт-дәстүрімен танысты.

Өзбекстан, Қырғызстан және Қазақстанның барлық өңірінен келген 100-ден астам ерікті бас қосқан танымдық сапар халықаралық достықты нығайтып, Арал аймағының туристік мүмкіндіктерін кеңінен таныстыруға арналды. Арал даласының айрықша келбетін айшықтайтын Шижаға ауылдық округі ерекше шағыл құмдарымен және сафари туризмін дамытуға қолайлы табиғи ландшафтымен ерекшеленеді. Құм жоталары мен кең байтақ даланың үйлесімі қонақтарға өңірдің туристік тартымдылығын бағамдап, туған жер табиғатының өзгеше сипатын тануға мүмкіндік берді. Сапар барысында қатысушылар ауылдың күнделікті өмірімен танысып, жергілікті жердің өзіндік ерекшеліктеріне қанықты. Табиғаттың осынау ерекше көріністері қоршаған ортаны сақтау, табиғи ресурстарға ұқыпты қарау және экологиялық мәдениетті қалыптастыру мәселелеріне де назар аудартты. Кездесудің тағылымды тұстарының бірі — қазақы қонақжайлық пен ұлттық мұраның дәріптелуі. Ақ дастарқан басындағы жарасымды жүздесу, қонақты құрметтеу мен ізет көрсету дәстүрлері халқымыздың кең пейілі мен дархан мінезін танытты. Ұлттық мәдениеттің осындай көріністері әр елден келген жастарға қазақ халқының рухани құндылықтарын жақынырақ түсінуге жол ашты. Шижаға ауылдық округіндегі танымдық шара Арал өңірінің табиғи әлеуетін, ауыл мәдениетінің байлығын және ұлттық дәстүрдің өміршеңдігін паш етті.

Дала төсінде өткен бұл жүздесу қатысушылардың туған өлке мұрасына деген қызығушылығын арттырып, табиғатты аялау мен халықаралық ынтымақтастықтың маңызын айқындай түсті