ҚҰРМЕТТІ АРДАГЕРЛЕР, ҚЫМБАТТЫ АҒА БУЫН ӨКІЛДЕРІ!

Сіздерді 1 қазан – Халықаралық Қарттар күнімен шын жүректен құттықтаймын!

Қазақ халқы қашан да үлкенін ардақтап, қариясын қазына санаған. «Қарты бар ел – қазыналы ел» деген қанатты сөздің өзінде халқымыздың үлкенге деген құрметі мен ізеті терең көрініс тапқан.

Сіздер – еліміздің өсіп-өркендеуіне өлшеусіз үлес қосып, саналы ғұмырларыңызды туған жердің дамуына арнадыңыздар. Әрқайсысыңыздың жүріп өткен өнегелі жолдарыңыз, маңдай термен атқарған еңбектеріңіз, өмірлік тәжірибелеріңіз бен ақыл-кеңестеріңіз кейінгі ұрпақ үшін баға жетпес мұра.

Бүгінде мемлекет тарапынан ардагерлер мен қарт азаматтарға жан-жақты қолдау көрсетіліп, олардың әлеуметтік жағдайын жақсартуға ерекше мән берілуде. Өздеріңізге белгілі ауданымызда да дәстүрлі «Ардагерлерді ардақтайық» жобасы аясында аудан ардагерлерін Байқоңыр, Қызылорда, Түркістан қалаларына саяхаттауға, сондай-ақ киелі мекендерге зиярат етуге жағдай жасалып келеді. Бүкіл ғибратты ғұмырын, қажырқайратын ел игілігіне жұмсаған аға ұрпақ өкілдерінің алдында қарыздармыз!

Құрметті ардагерлер!

«Ауылыңда ақсақалды қария болса – жазулы тұрған хатпен тең» деген бабалар сөзі бар. Ендеше, сіздердің әрбір өнегелі сөздеріңіз бен өмірлік тәжірибелеріңіз – еліміздің рухани байлығы, кейінгі ұрпаққа қалдырар асыл аманат.

Осы мерейлі күні баршаңыздың отбасыларыңызға амандық пен бақ-береке тілеймін! Әрбір шаңырақта шаттық орнасын!