АГРОӨНЕРКӘСІПКЕ ТЫҢ СЕРПІН
Елбасы Н.Назарбаев өзінің биылғы жолдауында Төртінші өнеркәсіптік революция жағдайындағы дамудың жаңа мүмкіндіктері туралы кеңінен тоқталып өтті. Жолдауда Мемлекет басшысы ең дамыған 30 елдің қатарына кіру жолындағы еліміздің 10 негізгі міндетін белгілеп берді. Оның ішінде агроэнеркәсіпті дамыту бағытына тоқталып, бұл біздің экономикамыз үшін үлкен ілгерілеушіліктің басты белгісі екенін баршамызға мәлім етті.
Атап айтар болсақ, «Ақылды технологиялар» – агроөнеркәсіп кешенін қарқынды дамыту мүмкіндігі сөз болды. Аграрлық саясат еңбек өнімділігін түбегейлі арттыруға және өңделген өнімнің экспортын ұлғайтуға бағытталуы керектігі басты назардан тыс қалмады. Расымен, біз шикізатты қайта өңдеуді қамтамасыз етіп, әлемдік нарықтарға жоғары сапалы дайын өніммен қайта шығатын болсақ қана, біз алмайтын асу жоқ.
Алайда, аталған мәселенің толыққанды шешімі табылу үшін барлық аграрлық кешеннің түбегейлі жұмылдырылуы да маңызды қадам болып саналмақ. Оны ғылым тұрғысынан дамытып, шикізат өнімдерін сырт елдерге экспорттауды, өзімізден тасымалданатын өнімдердің сапасының жоғары болуы біздің басым бағыттарымызды айқындайтын жоғарғыкөрсеткіштеріміздің бірі болып қалыптаспақ. Осыған орай аграрлық университеттердің оқыту жүйесін қадағалап, білім алып жатқан жас мамандарға тек диплом беріп шектеліп қана қоймай, ауыл шаруашылығы кешенінде нақты жұмыс істейтін немесе ғылыммен айналысатын мамандарды даярлау қажет.
Бұл үшін ең алдымен, жоғары оқу орындарының оқу бағдарламаларын жаңа нұсқада жазып, агроөнеркәсіп кешеніндегі озық біліммен үздік тәжірибені тарататын орталықтарға айналу талап етілуі керек.
Мысалы, егін егу мен астық жинаудың оңтайлы уақытын болжамдаудың, «ақылды суарудың», минералды тыңайтқыш себудің, зиянкестермен және арамшөппен күресудің интеллектуалды жүйелері арқылы өнімділікті бірнеше есе арттыруға болады.
Бұл, мемлекет бизнеспен бірлесіп, отандық өнімді халықаралық нарыққа шығарудың, сондай-ақ өзге де мемлекеттермен бірлесіп дамудың басты көрсеткіші саналмақ.
Алмасбек Қаржаубаев,
«Қармақшы – Даму» кәсіпкерлер қауымдастығының төрағасы, аудандық мәслихат депутаты.
