МАМАННЫҢ МӘРТЕБЕСІ – ЕҢБЕГІНДЕ

Солардың қатарында Сәуле Саймбетова да бар. Ол 1972 жылы Қармақшы ауданында дүниеге келген. 1979 жылы №27 мектеп табалдырығын аттап, 1989 жылы мектепті тәмамдайды. Медицина саласына қызығушылығы оны 1992 жылы Шымкент медициналық колледжіне жетелеп, 1995 жылы санитариялық фельдшер мамандығын алып шығуына себеп болады. Кәсіби білімін одан әрі жетілдіруді көздеген ол 2005-2008 жылдары Алматы қаласындағы Абай атындағы университетте оқып, метролог мамандығын меңгерген. Ал 2004 жылдан бері аудандық санитариялықэпидемиологиялық бақылау басқармасында бас маман болып қызмет атқарып келеді.

Салаға алғаш келген жылдары мен бүгінгі күннің арасында айтарлықтай өзгеріс бар. Технология дамып, жұмыс тәсілдері жаңарған, талаптар да күшейген. Дегенмен уақыт өткен сайын өзгермеген бір нәрсе бар. Ол – өз кәсібіне деген жауапкершілік.

– Салаға адамдардың денсаулығын қорғауға, аурудың алдын алуға және санитариялық жағдайды жақсартуға үлес қосу ниетімен келген едім. Осы қызметте 22 жылдан астам еңбек етуіме де өз жұмысымды жақсы көруім себеп болды. Жылдар өте жүйе өзгергенімен, негізгі мақсатымыз сол күйінде қалды. Өз ісіңді адал атқарып, адамдарға пайдаңды тигізу – мен үшін еңбектің мәні. Жұмысыңның нәтижесін көріп, халықтың алғысын есту – үлкен марапат, – дейді білікті маман.

Сәуле Ахметқызының бас маман ретінде күнделікті атқаратын міндеттері бірнеше бағытты қамтиды. Атап айтқанда, ең алдымен санитариялық-эпидемиологиялық жағдайды бақылау, профилактикалық іс-шараларды ұйымдастыру, халық арасында санитариялық ағарту жұмыстарын жүргізу және заңнама талаптарының сақталуын қадағалау басты назарда тұрады. Әрбір күн алдағы міндеттерді саралап, атқарылатын шараларды жүйелеуден басталады.

Маманның қызметінде тұрғындармен тікелей байланыс та айрықша орын алады. Кей жағдайда санитариялық нормалардың мәнін толық түсінбеу немесе заңнамадағы талаптар туралы ақпараттың жеткіліксіз болуы түрлі түсініспеушіліктерге әкелуі мүмкін. Мұндай сәттерде маман мәселені тек талап қою арқылы емес, оның себебі мен маңызын түсіндіру арқылы шешуге тырысады. Өйткені бұл нормалардың түпкі мақсаты – қандай да бір шектеу қою емес, ең алдымен адамның өмірі мен қауіпсіздігін қорғау.

Оның айтуынша, санитариялық-эпидемиологиялық бақылаудың негізгі бағытының бірі – аурудың алдын алу. Жұқпалы дерттердің таралуына жол бермеу, тазалық нормаларының сақталуын қадағалау және тұрғындардың санитариялық сауатын арттыру арқылы көптеген қауіптің алдын алуға болады.

Бұл ретте қарапайым тазалық дағдыларының өзі үлкен рөл атқарады. Қолды жиі жуу, тағам өнімдерін дұрыс сақтау, ауызсудың қауіпсіздігіне көңіл бөлу, жұқпалы аурулардан қорғану үшін вакцинациядан өту – күнделікті өмірде назардан тыс қалмауы тиіс қарапайым қағидалар. Осындай әдеттердің қалыптасуы қоғамдық денсаулықты сақтауға берік негіз болады.

Санитариялық мәдениет адамның жұмыс орнынан емес, ең алдымен өз үйінен басталады. Сәуле Ахметқызы да кәсіби қағидаларын отбасылық өмірде ұстанып, үйдің тазалығына, жеке бас гигиенасына ерекше мән береді. Қолды уақытылы жуу, азық-түлікті дұрыс сақтау, олардың жарамдылық мерзімін тексеру секілді қарапайым нәрселер күнделікті тұрмыстың ажырамас бөлігіне айналған. Өйткені маман үшін тазалық пен қауіпсіздік – жұмыс уақытында ғана орындалатын міндет емес, адамның өмір салтына айналуы тиіс құндылық.

Сондықтан бұл сала қызметкеріне кәсіби біліммен қатар ұқыптылық пен адалдық та қажет. Маманның пікірінше, жауапкершілік, тиянақтылық, адалдық және кәсібилік – санитариялық қызметкерге қойылатын басты талаптар. Себебі атқарылған әр істің артында адам қауіпсіздігі тұр. Кейде көзге көрінбейтін қатердің алдын алу немесе дер кезінде дұрыс түсіндірудің өзі үлкен еңбекті қажет етеді.

Өз ісінің шебері отбасында да кәсіби ұстанымдарын берік сақтап, балаларына тазалық пен денсаулыққа жауапкершілікпен қараудың маңызын айтып отырады. Еңбекқорлық пен ұқыптылықты сөзбен ғана емес, өз ісімен көрсетуге тырысады. Өйткені жақсы тәрбие – күнделікті өмірдегі қарапайым әрекеттерден қалыптасады.

Бауыржан ҒАЛЫМҰЛЫ