АПОСТИЛЬ – ХАЛЫҚАРАЛЫҚ СТАНДАРТТАЛҒАН НЫСАН
Апостиль – құжаттардың шетел мемлекеттерінде заңды күшін растауға арналған халықаралық стандартталған куәландыру нысаны. Апостиль қойылған ресми құжаттар Конвенцияға мүше елдердің аумағында қосымша консулдық заңдастырусыз қабылданады.
Апостиль арнайы мөр немесе штамп түрінде ресімделеді. Ол құжатқа қол қойған лауазымды тұлғаның қолының түпнұсқалығын, оның қызметтік өкілеттігін және құжаттағы мөрдің немесе мөртабанның шынайылығын куәландырады. Апостиль құжаттың мазмұнын растамайды, тек оның ресми түрде рәсімделгенін дәлелдейді. Апостиль нысаны стандартталған және онда құжаттың шыққан мемлекеті, құжатқа қол қойған адамның аты-жөні мен лауазымы, куәландырған органның атауы, орны, күні, тіркеу нөмірі, мөрі және уәкілетті тұлғаның қолы сияқты мәліметтер қамтылады. Апостиль білім туралы дипломдар мен аттестаттарға, туу, неке қию және қайтыс болу туралы куәліктерге, сот шешімдеріне, нотариаттық құжаттарға, сенімхаттарға және басқа да ресми құжаттарға қойылуы мүмкін. Алайда дипломатиялық және консулдық құжаттарға, сондай-ақ кейбір коммерциялық немесе кедендік құжаттарға апостиль қолданылмайды.
Апостиль жүйесінің негізгі артықшылығы – халықаралық құжат айналымын жеңілдетуі. Бұл рәсім азаматтардың шетелде білім алуына, жұмысқа орналасуына, некеге тұруына, кәсіпкерлік қызмет жүргізуіне және басқа да құқықтық әрекеттерді жүзеге асыруына мүмкіндік береді. Сонымен қатар, уақыт пен қаржы шығындарын азайтып, құжаттарды халықаралық деңгейде тануды қамтамасыз етеді.
Апостиль – халықаралық құқықтағы маңызды құралдардың бірі. Ол мемлекеттер арасындағы өзара сенімді нығайтып, ресми құжаттардың шетелде танылуын жеңілдетеді. Сондықтан халықаралық қатынастардың дамуы жағдайында апостиль жүйесі азаматтар мен ұйымдар үшін үлкен практикалық маңызға ие.
А.МЫРЗАҒҰЛОВА,
Қармақшы аудандық сот әкімшісінің орынбасары
