ҚАРМАҚШЫ АУДАНЫНДА БҰҚАРАЛЫҚ СПОРТ ЖАҢА ДЕҢГЕЙГЕ КӨТЕРІЛУДЕ
Қызылорда облысы, Қармақшы ауданында бұқаралық спортты дамыту және тұрғындардың салауатты өмір салтын қалыптастыру бағытында жүйелі жұмыстар жүргізілуде. Соның айқын көрінісі - ІІІ-Интернационал ауылындағы дене шынықтыру-сауықтыру кешенінің тұрақты жұмыс істеуі.
2023 жылы пайдалануға берілген нысан заманауи талаптарға сай жабдықталып, ауыл тұрғындары мен жастар үшін спортпен айналысуға қолайлы орта қалыптастырды. Кешеннің жалпы аумағы 799,4 шаршы метрді құрайды.
Бүгінде мұнда күніне орта есеппен 80-ге жуық адам тұрақты түрде спортпен шұғылданады. Жастармен қатар ересек тұрғындар да кешен қызметін белсенді пайдаланып, денсаулықтарын нығайтуға және бос уақыттарын тиімді өткізуге мүмкіндік алуда.
Спорт нысанында күрес және жаттығу залдары жұмыс істейді. Сонымен қатар, дзюдо секциясы бойынша жүйелі жаттығулар жүргізіліп, жас спортшылар түрлі деңгейдегі жарыстарға дайындалуда. Білікті жаттықтырушылардың еңбегі нәтижесінде ауыл жастарының спортқа қызығушылығы артып, жаңа буын спортшылары қалыптасуда.
Аудан көлемінде мұндай инфрақұрылымдардың дамуы бұқаралық спорттың кеңінен таралуына ықпал етіп, тұрғындардың белсенді өмір салтын ұстануына жол ашуда.
ІІІ-Интернационал ауылындағы дене шынықтыру-сауықтыру кешені - бұқаралық спортты дамытуға серпін беріп, салауатты ұлт қалыптастыру жолындағы маңызды әлеуметтік нысандардың бірі болып отыр.
