«КІТАП – AMANAT» ЖОБАСЫ АЯСЫНДА ЖАСТАРМЕН КЕЗДЕСУ ӨТТІ
Бүгін «AMANAT» партиясы Байқоңыр филиалының «Космос» бастауыш партия ұйымының ұйымдастыруымен «Кітап – AMANAT» партиялық жобасы аясында «Кітап — жарық ғалам» тақырыбында жастармен мазмұнды кездесу ұйымдастырылды.
Іс-шараның негізгі мақсаты – жастар арасында кітап оқу мәдениетін қалыптастыру, рухани-танымдық деңгейін арттыру және білімге деген қызығушылығын күшейту.
Кездесу барысында кітаптың адам өміріндегі орны, оның тұлғалық дамуға әсері, сондай-ақ қазіргі ақпараттық қоғамдағы оқырман мәдениетінің маңызы кеңінен сөз болды.
Жастармен ашық форматта өткен пікір алмасу барысында сүйікті кітаптар, оқу әдеттері, заманауи әдебиет пен классикалық шығармалардың құндылығы талқыланды. Сонымен қатар, кітап оқу арқылы ой-өрісті кеңейту, сыни ойлау қабілетін дамыту және өзін-өзі жетілдіру мәселелері қозғалды.
«Бүгінгі таңда кітап – тек білім көзі ғана емес, ол – рухани байлықтың, саналы ойдың және кемел келешектің негізі. Осындай тағылымды кездесулер жастарды кітапқа жақындатып, олардың интеллектуалдық әлеуетін арттыруға зор ықпал етеді», - деп атап өтті «Космос» БПҰ жетекшісі Ж.Садыкова.
Алдағы уақытта да «Кітап – AMANAT» жобасы аясында жастарды білім мен руханиятқа баулитын игі бастамалар жалғасын табатын болады.
