Білім-спорт саласының ардагері референдумда өз таңдауын жасады
Бүгін Қармақшы ауданының Жосалы кентіндегі №30 орта мектебінде орналасқан №100 референдум участогінде алғашқылардың бірі болып білім-спорт саласының ардагері, Қармақшы ауданының құрметті азаматы Төленді Мырзабаев таңдауын жасап, дауыс берді.
-Референдумға қатысу мемлекетіміздің болашағына бейжай қарамайтын әрбір азаматтың міндеті деп ойлаймын. Әсіресе аға буын өкілінің кейінгіге көрсетер үлгісі көп. Бұл игі бастама мемлекет дамуының тұрақтылығы, сондай-ақ әділдік пен бірлікті нығайта түсуге және жарқын болашағымыз - жас ұрпағымыздың жайлы келешегін қамтамасыз етуге бағытталған бетбұрыс деп есептеймін. Еліміздің тағдыры шешілетін мұндай маңызды шақта үлкеніміз бен жасымыздың жасаған таңдауымыз, берген дауысымыз мемлекетіміздің болашағына қосылған үлкен үлес болмақ. Мен де Жосалы кентіндегі 100 участокке келіп, ардагер әріптестеріммен бірге өз таңдауымды жасадым, - дейді ардагер ұстаз.
