ҚАРМАҚШЫ АУДАНЫНЫҢ ӘЛЕУМЕТТІК-ЭКОНОМИКАЛЫҚ КӨРСЕТКІШТЕРІНДЕ ОҢ ӨСІМ БАР
Қармақшы ауданында әлеуметтік-экономикалық даму бағытында тұрақты өсім қалыптасып келеді. Бұл туралы Қызылорда облысының Өңірлік коммуникациялар қызметіндегі брифинг барысында аудан әкімі Жандос Еркінбек мәлімдеді.
-Жалпы, ауданның әлеуметтік-экономикалық жағдайы жыл сайын өркендеп, өсіп жатқаны байқалады.
Оның бір дәлелі ретінде аудан бюджетінің ұлғаюын айтуға болады. Жасалған жұмыс нәтижесінде аудан бюджеті 9,8 млрд теңгеге өсіп, жыл қорытындысымен 22 млрд теңгені құрады. Сонымен қатар бюджеттің өз кірістері де артты. Жыл басында 2 млрд 932,5 млн теңге болып бекітілген кіріс бөлігі жыл соңында 3 млрд 434,5 млн теңгеге жетіп, 502 млн теңгеге ұлғайды. Сондай-ақ 2025 жылдың қорытындысымен Қармақшы ауданының барлық негізгі макроэкономикалық көрсеткіштері 100 пайыз немесе одан жоғары деңгейде қалыптасты,- деді аудан басшысы.
