СЫР ҚАЛАСЫ - АЛАШ АСТАНАСЫ
Биыл - аймақ тарихы үшін айтулы жыл. Алғашқыда Ақмешіт, кейіннен Қызылорда атанған қаламыздың Алашқа астана болғанына 100 жыл толып отыр. Осы мерейтойға арнайы аудандық музейде "Сыр қаласы - Алаш астанасы" тақырыбында көрме өткізілді.
Бұл көрме еліміздің кешегісі мен бүгінін таразыға салып, тарих толқынындағы өз бағамызды бағамдайтын іс-шара. Көрмеде тың деректер жазылған шаһарымыздың ертедегі тарихы және қазіргі көрінісі сипатталды. Астана болған жылдардағы қаланың саяси ахуалы айтылып, өткенінен хабар беретін тарихи-танымдық суреттер қойылды.
Көрменің мақсаты - қазақ елінің тағдырымен байланысып жататын астаналардың тарихына шолу жасау, қазақ халқының ғасырлар бойы өткен қиыншылықтарын айта келіп, осы зұлмат жылдары елінің азаматтығын аңсаған ұлт зиялыларына тоқталу, өз елін, жерін қорғайтын ұрпақ тәрбиелеу.
