СЫР АРДАГЕРЛЕРІ ӘН ДОДАСЫНДА
Сәрсенбі күні А.Тоқмағамбетов атындағы қалалық мәдениет үйінде руханиятпен астасқан ерекше өнер мерекесі өтті. Облыстық ардагерлер кеңесі мен қалалық мәдениет және тілдерді дамыту бөлімінің ұйытқы болуымен Қазақстанның халық артисі, ұлт жадында өшпес із қалдырған композитор Шәмші Қалдаяқовтың 95 жылдығына, сондай-ақ Қызылорда қаласының астана болғанына 100 жыл толуына арналған «Қазақ вальсінің королі – Шәмші» атты ардагерлер арасындағы облыстық ән байқауы ұйымдастырылды.
Салтанатты шараның шымылдығы Шәмші Қалдаяқовтың өмірі мен өнер жолын айшықтайтын арнайы бейнероликпен түріліп, көрермендер қазақ музыкасының падишасымен қайтадан табысқандай күй кешті. Оның артынша даңқты композитордың рухына арналған Қалдыбек Құрманәлінің жүректі тербейтін «Шәмші аға» әні шырқалып, кештің көркемдік ажарын аша түсті.
Өнер додасының ашылуында облыстық ардагерлер кеңесінің жауапты хатшысы Мақсұт Баекеев қатысушыларға жүрекжарды жылы лебізін білдіріп, сәттілік тіледі. Байқауға облыстың барлық ауданынан, сондай-ақ Байқоңыр мен Қызылорда қаласынан барлығы жиырмаға жуық өнерпаз қатысып, өз өнерлерін ортаға салды. Олардың өнерін бағалаған қазылар алқасының құрамында «Құрмет» орденінің иегері, белгілі композитор Рамазан Тайманов, «Ерен еңбегі» медалінің иегері, ҚР «Мәдениет саласының үздігі» Сәбит Ұлықпанұлы және ҚР «Мәдениет саласының үздігі» Ляйла Насимханова сынды елімізге танымал өнер майталмандары болды.
Байқау екі кезеңнен тұрды. Алғашқы кезеңде қатысушылар Шәмші Қалдаяқовтың нәзік лиризмге толы, сыршыл да әуезді әндерін орындап, тыңдарманын бірде балалық шаққа, бірде жастықтың мөлдір сезіміне жетеледі. Ал екінші кезеңде Сыр елі, Қызылорда өңіріне арналған әндер әуелеп, сахнада туған жерге деген махаббаттың мөлдір сазы төгілді. Әрбір орындаушының жүректен шыққан үні мен шынайы өнері Шәмші мұрасының мәңгілік екенін тағы бір мәрте айшықтады.
Бұл кеш – музыка мерекесіне, ардагерлердің өнерге деген адал құрметіне, ұлттық ән қазынасына деген шексіз сүйіспеншілігіне айналды. Көрермен де, қазылар да, қатысушылар да Шәмші әуенінің құдіретін қайта сезініп, рухани ләззатқа бөленді.
Байқауда ауданымыздың намысын қорғаған белгілі композитор, өнер жанашыры Керекжан Құлмырзаев өз таланты мен шеберлігін жоғары деңгейде көрсетіп, ІІ орын иегері атанып, арнайы дипломмен марапатталды. Ол алғашқы кезеңде Шәмшінің сырлы да сазды «Қаракөз» әнін баян сүйемелімен орындап, тыңдарманды тәнті етсе, екінші кезеңде өзінің төл туындысы жүрек тербейтін «Сыр сұлуым – ән бағым» әнін әуелетті.
Өнерге деген құрмет пен таланттың тоғысқан бұл мерейлі кеші әр жүректе жылы әсер қалдырып, Сыр елінің мәдени өміріндегі жарқын шаралардың бірі ретінде есте қалды.
Ақнұр САҒЫНТАЙ
