Күзгі сыр

Күзгі сыр Кеузеліппін,
дәні жоқ кебектеймін,
Дәрменсізбін, суық күзде дедектеймін.
Дәйегі бұл өмірдің осы ма деп,
Мәйегін өлеңімнің ... өбектеймін.
Өмірімнің бір парасы – сағымды жыл,
Ойнақтаған шалғайда – құлын дүл-дүл.
Есейгеннен есімде, өшпес белгі,
Өзгертпедім ойымды – сендім құмбыл.
Әлсіздігім бастырмай биіктерге,
Төменшектеп ... ештеңе есітпеуге.
Әйелдігім... сан түрлі тарау-тарау,
Ұмытылдым – тек уақыттан кешікпеуге.
Сабырменен сансырап жетіп зорға,
Жығылмадым, тайса да қалың сорға.
Демегенің... қасиетті қара өлеңім,
Рух бердің – мегзедің адал жолға!
Өмір-өлең, өткелсіз бұра тартар,
Жолдас болған өлеңмен бұны байқар.
Сұрқай күзде қоштаспан байырғы дос,
Талай, талай таңдардан үмітім бар.