“Заң және тәртіп” жобасы аясында ата-аналармен кездесу өткізілді

Қармақшы аудандық прокуратурасының аға прокуроры Е.Мусаев, жастар денсаулық орталығының психологы Ә.Кетебаев, жастар ресурстық орталығының директоры Н.Пірназаров және білім бөлімінің әдіскері А.Кенжебаевтың қатысуымен №121 мектепте ата-аналар жиналысы өтті.

Жиынға ата-аналар мен мектеп психологтары қатысып, жасөспірімдер арасындағы маңызды тақырыптар талқыланды:

құқық бұзушылықтың алдын алу;

суицидтің алдын алу;

нашақорлыққа қарсы күрес;

отбасы құндылықтарын сақтау;

Мамандар ата-аналарға бала тәрбиесінің отбасынан басталатынын, әрбір ата-ананың жауапкершілігі зор екенін атап өтті. Балалардың бос уақытын тиімді пайдалану, спорт пен өнерге баулу, жақсы әдет қалыптастырудың маңызы айтылды.

Аудандық прокуратураның өкілі құқықтық сауаттылыққа тоқталса, психологтар ата-ана мен бала арасындағы сенім мен ашық әңгімелесудің қажеттігін жеткізді.

Жиын соңында «Жақсы отбасы – жақсы қоғамның негізі» екені ерекше атап өтіліп, барша ата-анаға ұрпақ тәрбиесінде белсенді болуға үндеу жасалды.