Сағыныш деген

Сағыныш деген – сарғайған сезім,

Жүрекке маза бермейтін.

Санамда сайрап, өткен бір кезім,

Тулатып жанды тербейтін.

Сағыныш деген – ұлы бір сезім,

Бәрі сезіне бермейтін.

Кеудеден кетіп тағатсыз төзім,

Таба алмас дауа емдейтін.

Сағыну деген – ғажап бір сезім,

Шын ғашық ұға алатын.

Еске алып ессіз бақытты кезін,

Жүрекке медет табатын.

Сағыныш деген – жібектей нәзік,

Үзілсе, қайта жалғанбас.

Сезімсіз адам – соқырдай ғәріп,

Өмірден орын таба алмас.

Сағыну деген – екі жүректің,

Тілдесуі ғой үн қатып,

Сарсаңға салған мына заманда,

Сағына білу – бір бақыт.

Сағыныш деген – бағалы сыйлық,

Қадірін білсең қолдағы.

Бір ауыз сөзден бәрін түсінем,

«Сағындым» десең болғаны...