ҚАРМАҚШЫДА БАЛАЛАРДЫ ҚОРҒАУ КҮНІНЕ ОРАЙ МЕРЕКЕЛІК ІС-ШАРА ӨТТІ

1 маусым – Халықаралық балаларды қорғау күніне орай Жосалы кентінің орталық алаңында мерекелік шара өтті.

Іс-шараға аудан әкімінің орынбасары Самат Қыдырбекұлы қатысып, бүлдіршіндерді құттықтап, аудан әкімінің құттықтауын жеткізді. Ол өз сөзінде балалардың жан-жақты дамуына бағытталған жұмыстар ауданда жүйелі түрде жүргізіліп жатқанын атап өтіп, бұл бағыттағы шаралар алдағы уақытта да жалғасын табатынын айтты.

Мерекелік бағдарламада мектеп оқушылары мен балабақша тәрбиеленушілері өнер көрсетіп, көрермендерге көтеріңкі көңіл күй сыйлады. Ән мен биден құралған көріністер көпшіліктің ықыласына бөленді.

Сондай-ақ, асық ату, қол күрес, тоғызқұмалақ және ләңгі тебу сынды ұлттық ойындардан жарыстар ұйымдастырылып, балалардың белсенді қатысуымен жоғары деңгейде өтті.