ҚАРМАҚШЫЛЫҚТАР БІРЛІК МЕРЕКЕСІН АТАП ӨТТІ
Бүгін Қармақшы ауданының орталығында Қазақстан халқының бірлігі күні және Қазақстан халқы Ассамблеясының 30 жылдығына арналған «Татулығы жарасқан – берекелі Қазақстан» атты мәдени-көпшілік іс-шара өтті.
Мерекелік шараға аудан әкімі Жандос Еркінбек қатысып, жиналған жұртшылықты ынтымақ пен бірліктің мейрамымен құттықтады. Өз сөзінде аудан басшысы елдің тұрақтылығы мен дамуы үшін бірлік пен келісімнің маңыздылығын атап өтті. Сонымен қатар, татулық пен сыйластық салтанат құрған қоғамда берекелі тірлік орнап, болашаққа сенімді қадам жасауға мүмкіндік бар екенін жеткізді.
Думанды жиында қазақ халқымен қатар, Қазақстанды мекендеген түрлі этнос өкілдерінің өнері көрермен назарына ұсынылды. Олар ұлттық әндерін орындап, би билеп, халықтың мәдени алуандығын айшықтады.
Мерекелік шара барысында әр ұлттың ұлттық тағамдары ұсынылып, түрік ұлтының дәстүрлі «Беташар» рәсімі сахналанды. Сонымен қатар, бірлік күніне орай арнайы сурет көрмелері ұйымдастырылып, шығармашыл жастардың туындылары көпшілік назарына ұсынылды.
Жиналған халық мерекені көтеріңкі көңіл-күймен атап өтіп, бірлікті дәріптеген думанды іс-шара мәресіне жетті.
