ЖАҢА ЖАБДЫҚ – САПАЛЫ МЕДИЦИНАҒА МҮМКІНДІК
Бүгінде аймағымызда денсаулық сақтау саласына ерекше көңіл бөлініп келеді. Соған сәйкес ауруханалардың материалдық-техникалық базаcын нығайту мәселесі де қолға алынуда. Осы орайда Байқоңыр қаласының көпбейінді ауруханасына облыс әкімі Нұрлыбек Нәлібаевтың тапсырмасына сәйкес 405 млн теңгенiң компьютерлік томография аппараты алынды. Жаңа жабдық халыққа сапалы медициналық көмек көрсету жұмысын жандандыра түспек.
Қазақстан Республикасы Президентінің «Байқоңыр» кешеніндегі арнаулы өкілі, облыс әкімінің орынбасары Қайрат Нұртай, облыстық денсаулық сақтау басқармасының басшысы Олжас Ысқақов және Байқоңыр қаласы әкімшілігінің басшысы Константин Бусыгин қаладағы көпбейінді аурухананың компьютерлік томография аппараты кабинетiнiң ашылуына қатысып, ұжымға тілектестік білдірді.
– Бұл – біздің қала үшін өте маңызды оқиға. Мемлекет басшысы, Үкімет пен облыс басшылығының ерекше қолдауының арқасында халықтың әлеуметтік жағдайының басты бір көрсеткіші болып табылатын медициналық қызмет көрсетудің сапасына зор көңіл бөліп келеді, – деді облыс әкімінің орынбасары.
Аурухананың бас дәрігерi Сұлтан Кенжебаев пациенттерге сапалы медициналық қызмет көрсету деңгейін жоғарылатудағы жұмыстарды, алдағы жоспарларды атап өтті.
Айта кетейік, соңғы жылдары Байқоңыр қаласының көпбейінді ауруханасы ның материалдық-техникалық жабдықталуында айтарлықтай жұмыстар атқарылуда. Өткен жылы 810 млн теңгеге аурухананы заманауи медициналық жабдықтармен қамту жүргізілді, оның ішінде «Компьютерлік томограф», «Сандық маммографиялық жүйе», «Рентгендік флюорографиялық станционарлық цифрлық аппараты», 5 санитарлық автокөлік және тағы басқа жабдықтар алынды.
Жаңадан іске қосылған аппараттар ауруды ерте анықтау, емдеу ісіне тың серпін беріп, қызмет сапасын жақсартады. Сол себепті алдағы уақытта медициналық қызметтерді одан әрі жетілдіру бойынша нақты қадамдар жоспарлануда.
Ақнұр САҒЫНТАЙ
