БЕЛСЕНДІ ЖАСТЫҢ БЕЛЕСІ
Қай елдің болсын басты капиталы оның халқы, соның ішінде жастары болып табылады. Жастар – қай заманда, қай мемлекетте болсын асқақ арман мен үміттің, биік ар мен өр намыстың символы болған. Сондықтан да, әлем жұртшылығы жастардың алып күш иесі екендігіне сеніммен қарайды, олармен санасады. Жастардың жаңа белестерге деген ұмтылысы мен жаңа идеяларының туындауына себепші болады.
Ал жаңа идея кез келген мемлекеттің жаңаруына бағыт алып, мемлекеттің жаңа келбетін қалыптастыруға нық қадам бастайды. Осындай ел болашағының кепілі, халықтың үкілі үмітін ақтау мақсатында тер төгіп білім алып жүрген, аянбай еңбек етіп жүрген жастар аз емес. Осындай белсенді жастың бірі – Нұрайым Жасұланқызы.
Ол ауданға қарасты Байқоңыр қаласында дүние есігін ашқан. Кішкентайынан ізденімпаз әрі белсенді бүлдіршін атанады. Мектепте үздік оқушы болып қана қоймай, қоғамдық жұмыстарға атсалысып, одан бөлек В.Комарова атындағы қалалық мәдениет үйіндегі би үйірмесіне қатысып, үлкен сахнаға қадам басқан. Өнерге, көпшілік ортаға деген құштарлығы осы кезден басталса керек.
No272 орта мектепте білім ала жүріп, республикалық байқаулардан бой көрсетіп, мәнерлеп оқу, сахналық көрініс, ұлттық би номинациялары бойынша, тіпті сұлулық байқауларында бақ сынап жеңімпаз атанған. Мәселен, Байқоңыр қаласының әкімі К.Бусыгиннің жастарды қолдау мақсатындағы бір реттік берілетін шәкіртақы иегері атанып, «Сөз ұлылығы» атты оқушылар мен студенттерге арналған IV республикалық әдеби шығармашылық байқауынан бас жүлде иеленіп, «Жас дарын» медалімен марапатталған.
Мектеп бітірушілер үшін маңызды белес саналатын Ұлттық бірыңғай тестілеуден 124 балл еншілеп, жоғарғы көрсеткішпен Қорқыт ата атындағы Қызылорда университетіне грантқа түскен. Қазіргі таңда аталған жоғарғы оқу орнының қазақ тілі мен әдебиеті мамандығы бойынша 4-курс студенті.
Нұрайым студенттік өмірде үздік оқумен қатар, қоғамдық жұмыстарға да белсенді араласып, біршама жетістікке жеткен. Бірінші курстан бастап жан-жақтылығымен көзге түсіп, Қорқыт ата атындағы Қызылорда университетінің төсбелгісін тағынды. «Жылдың үздік волонтері» атанып, «Жастар саясатына қосқан үлесі үшін», «Қазақстан Республикасының үздік студенті» төсбелгісінің иегері атанды. «Білімнің жұлдызы» жобасында 100 000 теңгелік шәкіртақыға ие болған. Сонымен қатар, көркем сөз оқу, эссе байқауларынан жүлделі орын алып, ақшалай сыйлық иеленді. Тағы бір үлкен жетістігі – ҚР Президенттік шәкіртақысының 3 мәрте иегері. Одан бөлек өткен жылдың қорытындысы бойынша «Qadam» жастар сыйлығының «Жігерлі жас» номинациясын иеленіп, ақшалай 150 000 теңге сыйақымен марапатталды. Бұл Нұрайымның жетістіктерінің бір парасы ғана.
Өз қатарластарынан білімге деген ерекше ынтасымен ерекшеленетін жастың қалам тербеуден де хабары бар. Ізденіске толы ғылыми мақалалары халықаралық, республикалық журналдарда жарияланса, газет беттерінде қоғамдағы өзекті мәселелерді тереңінен толғай білген.
– Менің өмірдегі басты мақсатым – білімді әрі білікті маман болумен қатар үкілеген үмітті ақтаған перзент, келешек ұрпаққа қалдырар мұрасы бар, аларынан берері көп, нағыз ұлтжанды, еңбектің өнбегін адал алатын, пайдасы көпке тиетін дара тұлға болу. Осы жолда үздіксіз ізденуге, білім алуға бармын. Арман-мақсатыма қарай Абайша айтқанда «Ақырын жүріп, анық басып келемін», – дейді Нұрайым Жасұланқызы.
Мақсаты айқын жалынды жастың қоғамға берері көп. Бүгінгі күннің өзінде Нұрайым волонтер ретінде аз қамтылған отбасының балаларын тегін Ұлттық бірыңғай тестілеуге дайындауда. Бұл болашақтың жарқын болуына қосқан елеулі үлес дер едік. Осындай кемел келешек жолында оң қадамға бастайтын жастарымыз көп болғай.
Ардақ СӘКЕНҚЫЗЫ
