ЖАСТАР – ҚАШАНДА АСҚАҚ АРМАН МЕН ҮМІТ, БИІК АР МЕН ӨР НАМЫСТЫҢ СИМВОЛЫ. ҚАЙ ЕЛДІҢ БОЛМАСЫН БАСТЫ КАПИТАЛЫ ХАЛҚЫ ДЕСЕК, СОНЫҢ ІШІНДЕ ЖАСТАР – ҚОҒАМНЫҢ ЖЕТЕКШІ КҮШІ РӨЛІН АТҚАРАДЫ.
Төретам кентінде 12 тамыз – халықаралық Жастар күні мерекесіне арналған «Жалынды жастар – жарқын болашақ» атты мерекелік кеш өтті. Мәдени іс-шара әсем әнмен ашылып, кент өнерпаздарының шағын концерттік бағдарламасына ұласты. Кештің екінші бөлімі белсенді жастардан құрылған «Бірлік» қоғамдық қорының ұйымдастыруымен қазақтың ұлттық спорт ойындарымен жалғасын тапты. Асық ату, қол күрес, арқан тартыс, гір көтеру сынды бірқатар ойын ойналып, белсенді жастардың ұйымшылдығы сайысты одан әрі қызықты, әрі тартымды етті. Жастар қазақ тарихынан сыр шертетін сұрақтарға да жауап беріп бақ сынасты. Сайыс жеңімпаздарына «Бірлік» қоғамдық қоры дайындаған арнайы жүлделер мен дипломдар, бағалы сыйлықтар табыс етілді.
Іс-шара соңында кент әкімі Ғ.Елеусіновтің арнайы алғыс хатымен «Бірлік» қоғамдық қорының төрағасы Қанат Кушенов, Айдос Серімбетов, Данияр Насрадинов және кент өнерпаздары Бақтияр Сабырбаев, Азамат Адаев сынды белсенді жастар марапатталды. Осындай көңілді әрі тәрбиелік мәні бар, жастардың бос уақытын тиімді өткізуге бағытталған игі шаралар алдағы уақытта да жалғаса бермек.