ҚҰТТЫ МЕКЕН - ҚУАҢДАРИЯ АУЫЛЫНА 60 ЖЫЛ
Қуаңдария ауылының 60 жылдық мерейтойына орай ұйымдастырылған мәдени-көпшілік іс-шараларға аудан әкімі Жандос Еркінбек қатысты.
Аудан басшысы мерейлі мерейтойға жиылған жұртшылықты ауылдың тарихи 60 жылдық белесімен құттықтап, елді мекеннің әлеуметтік-экономикалық дамуына үлес қосқан бірқатар азаматтарға мерекелік медальдар мен алғыс хаттар табыстап, құрмет көрсетті.
Іс-шара аясында еңбек ардагері Шегебай Құндақбаевтың «Шалғасқаттан Қуаңдарияға дейін» атты кітабының тұсаукесері өтті.
Мерейтойға арнайы шақырылған қоғам қайраткері Бекмырза Еламанов, Вьетнам соғысының ардагері Иса Бисенов және аудандық мәслихат төрағасы Әділ Қошалақов құттықтау сөздерін сөйлеп, ізгі тілектерін білдірді.
Мерекелік іс-шаралар әрі қарай ат бәйгесі мен ұлттық спорттық ойындармен жалғасты.
Айта кетейік, екі күнге созылған мерейтой аясында «Құтты мекен – Қуаңдария» тарихи мұражайының ашылуы, Ұлы Отан соғысының ардагері Әбдіраш Өмірбаевтың 100 жылдығына арналған «Өткенге құрмет – ұрпаққа өнеге» атты тағылымдық кеш және облыстық филармония өнерпаздарының, эстрада әншілерінің қатысуымен мерекелік концерт ұйымдастырылды.
